თემურ წიკლაურმა მოსკოვში სიმღერაზე უარი თქვა!

ბოლო ხანს საქართველოში უჩვეულო ტენდენცია გამოიკვეთა, - ცნობილ ხელოვანთა ღირსება რუსეთთან მათი დამოკიდებულების მიხედვით იზომება!

ამ დღეებში ხმა გავრცელდა, რომ ცნობილმა "ივერიელმა" თემურ წიკლაურმა განაცხადა უარი მოსკოვში სიმღერაზე. ამასთან დაკავშირებით მომღერალს კომენტარი ვთხოვეთ. მას "ივერიის" განახლებული მიუზიკლის, "ჩხიკვთა ქორწილის" წარმოდგენის წინადღეს შევხვდი. ბატონი თემური თავს შეუძლოდ გრძნობდა, გული მაწუხებს და მალე ოპერაცია უნდა გავიკეთოო.

- ბატონო თემურ, რუსეთში ვინ და რაზე გეპატიჟებოდათ?
- მიკვირს, საიდან გავრცელდა ეს ხმები, მე ხომ არავისთან არაფერი მითქვამს. თანაც, ერთი თვე გავიდა უკვე ამ მიპატიჟებიდან. მანანა თოდაძემ მთხოვა მოსკოვში ჩასვლა. უჩვეულო არაფერი მომხდარა. რუსეთში ცხოვრობს 600 ათასი ქართველი, რომელთაც "ივერია" იმაზე ნაკლებად არ უყვართ, ვიდრე საქართველოში. სწორედ ამ ქართველთა სახელით მთხოვდნენ, მემღერა ალექსანდრე ბასილაიას ხსოვნისადმი მიძღვნილ საღამოზე. 2005 წელს მისი "ჩხიკვთა ქორწილი" დაიდგა მოსკოვის ცირკის დარბაზში და იმავე დროს "ივერიამ" "ფიროსმანი" წარადგინა საკონცერტო დარბაზ "როსიის" სცენაზე.
მაშინ ჩვენმა ანსამბლმა ფაქტობრივად მთელი მოსკოვი დაიპყრო, რადგან ერთდროულად ორ წარმოდგენას ვმართავდით. "ჩხიკვთა ქორწილი" ასჯერ ნახა მოსკოველმა მაყურებელმა. დასანანია, რომ დღეს ეს არავის ახსენდება და მტრად მივიჩნევთ მთლიანად რუს ხალხსაც. არადა, პოლიტიკოსები ახვევენ ამ მტრობას თავს საზოგადოებას.
- ბევრი მათგანი მავანთა მიერ საქართველოს მოღალატედ სწორედ იმიტომ გამოცხადდა, რომ რუსეთში მოღვაწეობს.
- ვერავის განვსჯი. მე არ წავსულვარ და არც წავალ, მაგრამ ამას არსებითი მნიშვნელობა არა აქვს, როდესაც რუსეთში მოღვაწე ქართველებზე ვლაპარაკობთ, იმ ხალხს უჭირს და წავიდა, ამაში არაფერია გასაკვირი.
- ამბობთ, რომ არ წასულხართ და არც წახვალთ. ეს გადაწყვეტილება პროტესტის ნიშანია?
- გარანტია არ მაქვს, რომ ჩემი იქ ჩასვლა სწორად გაშუქდება მასმედიის მიერ, ეს ეხება როგორც რუსულ, ისე ქართულ მედიას. დააკვირდით, ჟურნალისტები ხშირად შარს მოსდებენ ისეთ პერსონებს, რომლებიც არა მხოლოდ ჩვენს ქვეყანაში არიან ცნობილი. მათ ჯერ გაკიცხავენ იმის გამო, რომ რუსეთში იმღერეს, მერე ისევ ხოტბას შეასხამენ... არავის აქვს უფლება, იქ მცხოვრები ქართველები აუგად მოიხსენიოს, რადგან სწორედ ისინი ინახავენ საქართველოს. განა ისინი არ აგზავნიან ფულს ოჯახების გადასარჩენად? განა ეს არ არის საქართველოს ეკონომიკის დახმარება? რა ვქნათ, მოვიგლიჯოთ ეს ხალხი გულიდან? ორი კონცერტი მქონდა ათენში და ღმერთო, ასეთი განცდით ჩემს ცხოვრებაში არ მიმღერია და არ შემცოდებია ჩემი ქვეყანა.
ამ ულამაზეს ხალხს იმხელა რა უბედურება დაატყდა, რომ ათენში სხვის შვილებს, სხვის მოხუცებს უნდა მოუარონ და თავიანთი ენატრებოდეთ. ასევე მქონდა კონცერტები ესპანეთსა და ამერიკაში. ყველგან ერთი და იგივე სურათია, - სამშობლოს გადასარჩენად სამშობლოს მოწყვეტილი ქართველები! რა განსხვავებაა რუსეთში მყოფი ქართული დიასპორისგან? უბრალოდ, რუსეთში უფრო დიდი ხანია ცხოვრობენ ქართველები, მაგრამ რა მათი ბრალია, ასე რომ მოხდა? ერთი ვინმე ებრალიძე გამოვიდა მტრის გუნდრუკის მკმეველი და იმას მიაბეს მთელი საქართველო! როგორ შეიძლება ერთი ვიღაც, თუნდაც გადამთიელის გამო მილიონი ქართველი მოღალატედ გამოაცხადო?
- ამ ყველაფრის მიუხედავად, თქვენ მაინც არ მიდიხართ მოსკოვში...
- რომ ჩახვალ, ისეთი სიტყვა უნდა თქვა, რომ საქართველოს და ქვეყნის გარეთ მყოფ ქართველებს წაადგე. მე კი არა ვარ იმხელა, რომ იმათ მივწვდე, ვისთანაც სიტყვაა სათქმელი. ამასობაში კი ჩემს იქ ყოფნას ისეთ კუდს მიაბამენ, რომელსაც საერთო არაფერი ექნება ჩემს მიზანთან.
- რაზე მიანიშნებს ცალკეულ პირთა მიმართ საზოგადოების ასეთი დამოკიდებულება?
- უღმერთობაზე! ისე გაშმაგებული ვებრძვით ერთმანეთს, თითქოს ერთმანეთს კი არა, მონღოლთა ურდოებს ვიგერიებთ. არადა, სიყვარულზე უნდა ვაშენებდეთ ქვეყანას. სხვანაირად მართლა მტრულად მოსულსაც ვერ გავუმკლავდებით, ნამდვილ მტერსაც ვერ ვიცნობთ. სხვანაირად ყოველთვის გვეყოლება მტერი, რადგან ქართველის მოძულე ქართველის დამარცხება იოლია. ჩვენ უნდა მივახვედროთ მთელი მსოფლიო, რომ ამ ქვეყანაში მხოლოდ მოყვრულად მომსვლელს გაუგებენ და მიიღებენ, იარაღით მოსულს კი საკადრის პასუხს გასცემენ ერთად მდგომი ქართველები. ახლა იოლად შესამჩნევი სწორედ ის არის, რომ ქართველები ერთად არ ვდგავართ.

ეკა ლომიძე

”კვირის პალიტრა”

წყარო/Source: http://www.ambebi.ge/sazogadoeba/15499-themur-tsiklaurma-moskovshi-simgheraze-uari-thqva.html#ixzz1R5MgNnS6